கட்டிட கலை & லாரி பேக்கர் - சிறு அறிமுகம் - தொடர் 01

   மனிதனின் அடிப்படை தேவைகளான உணவு, உடை, இருப்பிடங்களில் மூன்றாவதானதும் கலைகளின் புராதானதுமான கட்டிட கலையை பற்றி தொடராக எழுதலாம் என நிறைய நாட்கள் நினைத்து வந்தாலும் அதற்கான ஆரம்பமே இன்றுதான் கைகூடுகிறது. இந்த தொடரை கட்டிட கலையின் காந்தி என்றழைக்கப்படுபவரும், வீடு கட்ட ஆகும் செலவை குறைக்கும் ஆராய்ச்சியில் தன் வாழ்நாளை செலவழித்து வழிமுறைகளை வகுத்த “லாரி பேக்கர்” க்கு சமர்ப்பித்து ஆரம்பிக்கிறேன்.

பழங்காலத்தில் இயற்கை சீற்றங்களில் இருந்தும், வனவிலங்குகளிடமிருந்தும் தன்னை பாதுகாக்க குகைகளில் தஞ்சம் அடையும் போது ஆரம்பமாகிறது கட்டிடகலையில் அத்தியாயம். அதன்பின் பல பரிணாமங்களை கண்ட இக்கலை நவீன யுகத்திற்கேற்ப பிரமாண்ட வளர்ச்சியைடந்து இருக்கிறது என்று சொன்னால் அது மிகையில்லை.

நவீன யுகத்தில் தேவைகளுகான கலையாக வளர்ந்ததை விட அழகியல் சார்ந்து மிக வேக வளர்ச்சியடைந்தது. ஆனால் இந்தியா போன்று குடியிருக்க வீடின்றி தவிக்கும் ஏழை மக்கள் அதிகம் உள்ள நாடுகளிலும் இது அழகியல் சார்ந்து வளர்வதை காட்டிலும் அடிப்படை தேவைகளுக்கா வள்ர்வதுதான் உண்மையான வளர்ச்சி என லாரி பேக்கர் போன்ற மேதைகள் தொடர்ந்து வலியுறுத்து வருகிறார்கள்.

பேக்கரின் வீடுகள் பற்றிய தன் சிந்தனை வியப்பானது.

“உலகமெங்குமே ஒரு நடுத்தர வர்கத்து மனிதனின் வாழ்க்கை சேமிப்பில் பெரும்பகுதியை வீடுகள் பிடுங்கிக் கொள்கின்றன. நாற்பது ஐம்பது வருடம் ஒருமனிதன் ஒரு வீட்டுக்காக உழைக்கிறான் என்பதே அதற்குப் பொருள். அதைவிட அபத்தமான ஏதும் இல்லை. ஏன் என்றால் அந்த வீட்டின் ஆயுட்காலம் அந்த அளவுக்கு நீளமானதல்ல. கடனைக் கட்டிமுடிக்க வீடு பழையதாகிவிடுகிறது. இடிக்க வேண்டியதுதான். புதிய நாகரீகத்தில் வீடு போல ஒரு மாபெரும் வீண் வேறு எதுவுமே இல்லை.”

இதற்குக் காரணம் வீடுகட்டுவதில் உள்ள வணிகம். நம் வீடுகளின் பெரும்பகுதி தொழில்துறையால் உருவாக்கப்பட்ட பொருட்கள். தொழில்துறை அவற்றை நமக்கு தேவையானதாக ஆக்குகிறது. எளிய கடன் வசதிகள் மூலம் நம்மை அவற்றை வாங்கச்செய்கிறது. நமது வீட்டில் பயன்படுத்தப்பட்டுள்ள பொருட்கள் உண்மையில் நமக்குத் தேவைதானா என்பதையே நாம் அறிவதில்லை. தொழில்துறை உற்பத்தியாக வீடு இருக்கும்போது அதற்கு ஒரு பொதுத்தன்மை தேவையாகிறது. காஷ்மீர் முதல் கன்யாகுமரி வரை ஒரே பொருட்கள். ஒரே வடிவமைப்பு.

இந்தக் காரணத்தால் வீட்டின் கட்டுமானப் பொருட்களின் விலையில் அறுபதுசதவீதம் வரை அந்தபொருட்களை கொண்டுவந்து சேர்க்கும் செலவாக இருக்கிறது

இதனால் லாரி பேக்கர் ”ஒருபிராந்தியத்தில் கிடைக்கும் பொருட்களையும் திறமையையும் மட்டுமே பயன்படுத்தி அங்கே வீடுகளைக் கட்டுவது “ என்பதை அடிக்கடி வலியுறுத்தி வந்தார்.

லாரி பேக்கர் ஓரு சிறுகுறிப்பு

01.03.1917 - 01.04.2007

இங்கிலாந்தில் பிறந்து, இரண்டாம் உலகப் போரின் போது மிஷினரியின் மூலம் சேவை செய்ய 1945 ல் இந்தியா வந்து தற்செயலாக காந்தியடிகளைச் சந்தித்து அவருடைய விருப்பப்படி இந்தியாவில் தங்கி, கட்டடக் கலையில் காந்தியத்தன்மையைப் புகுத்தியவர் 2007ம் வருடம் ஏப்ரல் 1 ம் தேதி திருவனந்த புரத்தில் காலமானார்.

அவருடைய கட்டடங்கள் மிக எளிமையான அருகில் கிடைக்கக் கூடிய eco frindly பொருட்களைக் கொண்டு கட்டியவர். அவர் கட்டிய 3000 தனியார் ம்ற்றும் கேரள அரசு கட்டிடங்கள் கேரளா முழுவதும் காண முடியும்.

ஏராளமான விருதுகளை வாங்கிய அவருக்கு இந்திய அரசு 1991 ல் பத்மஸ்ரீ விருதை வழ்ங்கி கௌரவித்தது.

கேரள டாக்டர் எலிசபெத்தை மணந்து, இந்தியக் குடியுரிமை பெற்று கடந்த 50 வருடங்களாக திருவனந்தபுரத்தில் வாழ்ந்தவர்.

அவர் கேரள அரசுடன் இணைந்து COSTFORD எனும் தொண்டு நிறுவனத்துடன் செயல் பட்டு வந்தார்.

இனிமேல் வீடு கட்டுவ்தாக இருப்பவர்கள், Life, Work & Writings - Laurie Baker என்ற புத்தகம் G.Bhatia Penguin Publishers வாங்கிப் படித்து பயனடையலாம்

----------

லாரி பேக்கரின் கட்டிடத்தின் செலவுகளை குறைக்க உதவும் தொழில் நுட்பம் அடுத்த பாகத்தில்.....

----------